Deved и иднината на BeerJS Скопје

Како што најавивме пред неколку недели на социјалните мрежи, тимот позади BeerJS Скопје одлучи да основа граѓанско здружение. Процесот конечно се заврши утрово. Од денес, официјално почнува да постои Deved (веб страница наскоро) кој што ќе служи како официјалниот ентитет што го организира BeerJS Скопје.

Зошто здружение? 🤔

Мотивот за основање е пред се, практичен. Здружение значи правен ентитет, со сметка во банка на која што ќе може лесно да се примаат и распоредуваат средствата од спонзорства за настани и сите активности поврзани со BeerJS. Верувам дека повеќето читатели ќе се согласат дека „платете им фактурa на X и Y“ при договарање спонзорство не звучи најпрофесионално и сигурно. Всушност, се случувало и да не добиеме повратен одговор откако ќе кажеме што значи спонзорирање на настан.

Дополнително, имање на здружение ни овозможува и подобри начини за избегнување на ситуации каде што спонзори ни откажуваат во „5 до 12“ на веќе договорен настан. За среќа, не сме имале многу такви ситуации, ама дефинитивно си ја научивме лекцијата.

Како и до сега, остануваме 100% транспарентни со секоја активност.

Освен практичниот аспект, убеден сум дека (едукативни) непрофитни организации се клучни за развојот на нашата ИТ сцена. Причината е едноставна - го елиминирате профитот како примарен мотив. Остануваат едукацијата, создавањето контакти и релации со професионалците и ентузијастите итн. Секако, не можеме да плаќаме сметки со ентузијазам и финансиите ќе бидат дел од приказната. Но, тоа што сакам да го потенцирам е дека нема никогаш да бидат примарниот мотив и двигател на Deved и BeerJS (исто како и до сега).

Што значи тоа за BeerJS Скопје? 🤔

Од гледна точка на гостин, апсолутно ништо. Настанот што го знаете од 2017 останува ист. Квалитетот и организацијата ќе го задржат и се надеваме, подобрат нивото на кое што се. Навистина ни е драго што има се повеќе настани и активности на македонската ИТ сцена. BeerJS (и Deved), остануваат посветени на поддршката на сите локални настани, работилници и секакви активности што не прават подобри како индустрија.

За сите спонзори и поддржувачи, основањето на Deved значи побрз и поедноставен начин за поддршка на настанот и нашите активности. Работиме на документ за спонзорство и начини на поддршка што ќе биде јавно објавен наскоро (многу сме сериозни за она 100% транспарентност).

Додатно, во план ни се и други видови на настани и активности за кои што ќе објавиме информации наскоро. Една од тие активности е и CodePub - подкаст за ИТ, фокусиран на луѓето што работат во индустријата.

За крај, би сакал да ви се заблагодарам на сите што доаѓате на нашите настани, што не поддржувате, ни пишувате на социјалните мрежи, што сте активни на нашиот discord сервер …

BeerJS и Deved постојат за вас ❤️ 🍻